Për Barcelonën është një javë delikate pasi nesër pret Olympiakos-in ndërsa të dielën udhëton drejt Madridit për të luajtur klasiken me Real-in.
Kalendari i ngjeshur është një problem për Hansi Flick, të cilit i duhet të bëjë llogaritë me dëmtimet e shumta. Për ndeshjen e të dielës gjermani pret rikthimin e Ferran Torres dhe të Raphinha-s ndërsa për takimin me ekipin grek mund t’i duhet që të bëjë përsëri eksperimente siç ishte edhe ai në takimin kundër Girona-s, i cili u zgjidh nga një gol i Araujo-s në rolin e sulmuesit. Pikërisht pas atij goli tekniku gjerman doli nga vetja duke festuar me polemika duke bërë gjestin e “çadrës”.
“Nuk jam nervoz, nuk kam emocionet e njëjta si më para. Kur isha te Bayern më akuzonin se nuk qeshja kurrë. Tani kam të tjera emocione, Barrca më ka ndryshuar. Dua të jap gjithçka për këtë skuadër. Jetoj për këtë ekip. Por duhet edhe të ndryshoj sjellje pasi nuk është aspak i këndshëm fakti që nipi im të më shikojë në televizor duke bërë atë gjest”, tha Hansi Flick. Sa i përket Olympiakos-it, tekniku gjerman tha: “Janë një formacion me një sulm shumë të mirë. Statistikat e vërtetojnë këtë. Kam parë ndeshjen që zhvilluan kundër Arsenal dhe krijuan shumë raste për të shënuar. Duhet të kemi kujdes”.
