Portieri i Real Madridit, Thibaut Courtois ka reaguar, duke thënë se nuk do të kthehet në ekipin kombëtar të Belgjikës me trajnerin aktual.
Domenico Tedesco është trajner i kombëtares belge, i cili u caktua në vitin e kaluar.
Kjo është letra e plotë e Courtois:
“Ndjej një dashuri dhe krenari të madhe që përfaqësoj vendin tim në fushë, si dhe çdo njëri prej jush që mbështet Djajtë e Kuq. Ndihem i privilegjuar që kam pasur nderin të vesh fanellën kombëtare. As në ëndrrat e mia më të egra nuk mund të imagjinoja se do të kisha mundësinë ta bëja këtë më shumë se 100 herë.
Fatkeqësisht, pas ngjarjeve me trajnerin dhe pas shumë reflektimesh, kam vendosur të mos kthehem në ekipin kombëtar belg nën drejtimin e tij. Në këtë çështje, pranoj pjesën time të përgjegjësisë.
Megjithatë, duke parë përpara, mungesa ime e besimit tek ai nuk do të kontribuonte në ruajtjen e atmosferës së nevojshme të miqësisë. Federata, me të cilën kam pasur disa diskutime, pranon pozicionin tim dhe arsyet që më çuan në këtë vendim të dhimbshëm, por koherent.
Më vjen keq që mund të zhgënjej disa tifozë, por jam i bindur se kjo është rruga më e mirë për Belgjikën, pasi mbyll një debat dhe i lejon ekipit të përqendrohet në ndjekjen e objektivave të tij.
Ju falënderoj për mbështetjen tuaj të palëkundur, dashurinë dhe mirëkuptimin”.
