Sulmuesi nga Gjilani, Mirlind Daku festoi golin me Shqipërinë kundër Polonisë, duke hequr fanellën në fitoren e Shqipërisë me rezultat 2:0.
Por, në trupin e tij gjendej tatuazhi kushtuar Agim Ramadanit, ndërsa mediat serbe kanë kërkuar nga UEFA që t’i japin një dënim të rëndë Dakut.
Vetë sulmuesi i Shqipërisë ishte i ftuar në “Shqipëria LIVE”, teksa foli edhe për këtë çështje.
“Në fillim nuk e kisha mendjen te tatuazhi. Hoqa fanellën për të festuar golin. Më pas nisa të mendoja për tatuazhin dhe e bëra me shenjë nga ai. Dënim nga UEFA? Nuk më intereson fare, le të më dënojnë, pa problem, unë i marrë përsipër të gjitha. Vetëm Shqipërinë të mos e prekin nga dënimet”, tha Daku.
Gruaja e Agim Ramadanit, Shukrie Ramadani, ishte e ftuar në emisionin Shqipëria Live.
Gjithashtu në një lidhje paralele ishte edhe Mirlind Daku, që teksa i shënoi Polonisë, tregoi menjëherë tatuazhin kushtuar Agim Ramadanit, i njohur si Komandant Katana. Sigurisht që Shukrie Ramadani nuk mund ta fshinte krenarinë e madhe, teksa tregoi edhe një detaj shumë interesant nga Mirlindi.
“Kam pyetur mësuesen e fillores të Mirlind Dakut. Kur ishte i vogël, ai shkonte në shkollë vetëm me tuta sportive të ngjyrave kuqezi, është si Agimi”. Kështu u shpreh gruaja e Agim Ramadanit, Komandant Katanës, Shukrija, e cila ishte e ftuar në emisionin “Shqipëria Live”, shkruan Sport Ekspres.
Mirlindi është kujdesur dhe ka ftuar në “Air Albania” gruan e Agim Ramadanit, që do ta ndjek nga afër ndeshjen mes Shqipërisë dhe Çekisë.
