Kombëtarja shqiptare nuk pritet të ketë ndryshime në ndeshjen e kësaj të premteje në Pragë ndaj Çekisë, në krahasim me sfidat e muajit shtator, gjithnjë për Ligën e Kombeve.
Trajneri Sylvinho është i bindur të hedhë në fushë të njëjtët lojtarë siç bëri kundër Ukrainës, dhe deri diku ndaj Gjeorgjisë.
Ndryshimi i vetëm do të jetë sulmuesi Mirlind Daku, i cili është kthyer nga dëmtimi. Daku do të luajë në vend të sumuesit tjetër Rey Manaj, i cili është i dëmtuar.
Po ashtu, kombëtares i mungon edhe sulmuesi tjetër kryesor, Armando Broja, i cili është gjithashtu i lënduar.
Pjesa tjetër e ekipiit është e njëjta, edhe pse duhet parë gjendja fizike e Kristjan Asllanit.
Mesfushori i Interit ka qenë deri në fund në dyshim për shkak të një dëmtimi, ndonëse stafi mjekësor i kombëtares konfirmon se ai mund të luajë.
