Përzgjedhësi i Kombëtares së Shqipërisë, Sylvinho ka publikuar të premten listën e futbollistëve të ftuar për ndeshjet e këtij muaji në kuadër të kualifikimeve për “Euro 2024”.
Në listën prej 25 futbollistëve të ftuar nuk kanë munguar as risitë. Ndërsa, risitë më të mëdha janë ftesat për sulmuesit nga Kosova, Arbnor Muja e Mirlind Daku.
Muja është pjesë e Antwerpit të Belgjikës, ndërsa Daku bën karrierë në Rusi te skuadra e Rubin Kazanit.
Mirlind Daku, ish-reprezentuesi i Kosovës, është pjesë e listës dhe i gatshëm për të debutuar me “Kuqezinjtë”.
Pas ftesës që mori, 25-vjeçari reagoi edhe përmes llogarisë së tij në “Facebook”.
Ai publikoi një fotografi nga fëmijëria, ku shihet me fanellën e Shqipërisë.
Daku këtë fotografi e shoqëroi me mbishkrimin: “Që nga dita e parë”.
Shqipëria, të hënën nis grumbullimet për ndeshjet që do t’i ketë me Çekinë dhe Poloninë për kualifikimet në Evropianin e vitit të ardhshëm.
Duelin e parë, Shqipëria e luan më 7 shtator, ku në Pragë do të përballet me Çekinë. Ndërsa, tri ditë më vonë, e pret Poloninë në stadiumin “Air Albania” në Tiranë.
