Federata e Futbollit të Kosovës (FFK) ka publikuar sot programin zyrtar të Kombëtares A në kuadër të përgatitjeve për dy ndeshjet e rëndësishme të muajit tetor, kundër Sllovenisë dhe Suedisë.
Programi nis më 3 tetor, me shpalljen e listës së futbollistëve të ftuar nga përzgjedhësi Franco Foda. Më pas, më 6 tetor, ai do të dalë në një konferencë për media, që do të mbahet në Hotel Emerald në ora 12:00, transmeton lajmi.net.
Po të njëjtën ditë, në ora 17:00, do të zhvillohet edhe seanca e parë stërvitore në Kampin Nacional në Hajvali, ku do të fillojnë përgatitjet për dy sfidat ndërkombëtare.
Kombëtarja e Kosovës do të përballet me:
-
Slloveninë më 10 tetor në shtëpi
-
Suedinë më 13 tetor në udhëtim
Këto dy ndeshje janë të rëndësishme për vazhdimësinë e projektit të ri të ndërtuar nën drejtimin e trajnerit Foda, i cili do të kërkojë të testojë formën dhe përkushtimin e futbollistëve në këto sfida./lajmi.net/
