Drejtori sportiv i Barcelonës, Anderson Luis de Souza ‘Deco’, është shprehur optimist për të ardhmen e Frenkie de Jong me fanellën blaugrana. Në një intervistë ekskluzive për ‘El Mundo Deportivo’, ish-mesfushori i Barçës theksoi se mesfushori holandez, i cili ka kontratë deri në vitin 2026, është shumë pranë rinovimit.
“Jemi duke biseduar. Frenkie po e shijon shumë qëndrimin këtu. Ka arritur një pjekuri në të gjitha nivelet, me familjen dhe në ekip. Nëse je lojtar me karakter, nuk do të rrish në Barcelonë vetëm për qytetin, por sepse dëshiron të konkurrosh për tituj. Ai e sheh këtë mundësi dhe dëshiron të qëndrojë. Për ne është një lojtar themelor për projektin aktual dhe për vitet e ardhshme, ndaj besoj se do ta përmbyllim me sukses,” deklaroi Deco.
Sipas tij, rinovimi i De Jong deri në vitin 2029 është i afërt: “Po, e shoh shumë pranë,” tha drejtori sportiv, duke e cilësuar holandezin një gur kyç në skuadrën që po ndërton trajneri Hansi Flick.
Ky konfirmim qetëson ambientin katalanas, pasi De Jong shihet si një nga liderët e mesfushës në projektin afatgjatë të Barcelonës.
