Rafael Varan së fundmi e la futbollin për shkak të dëmtimeve. Pak muaj pas tërheqjes nga futbolli i luajtur, Varane foli me bashkëkombasin e tij te Reali, Tçuameni, në podkastin e lojtarit të Madridit për jetën e tij sportive.
Në këtë bisedë ai shpjegoi largimin e tij nga Reali i Madridit në vitin 2021. “Nuk zgjohesh në mëngjes dhe mendon të largohesh nga Madridi”, filloi francezi, duke rrëfyer se ishte në vitin 2018 kur filloi të mendonte të largohej nga Reali.
“Kur ne po festonim Ligën tonë të katërt të Kampionëve, ishte thjesht kështu. Ishte normale. Ti fiton Ligën e Kampioneve dhe tashmë po të kërkojnë një tjetër. Duhet të shkosh për një tjetër”, tha ai, duke shtuar se “atëherë fitova Kupën e Botës dhe i kisha bërë të gjitha. I kisha arritur të gjitha. Arrita në një pikë në jetën time ku duhej të mendoja nga e para për karrierën time dhe të shihja se si duhej të ndihesha”.
“Madridi ishte… Nuk mund ta përshkruaj. Ishte i jashtëzakonshëm, por tashmë e kisha përjetuar. Doja të përjetoja diçka ndryshe. Për mua, Anglia dhe Mançesteri kanë diçka të veçantë. Pasionin për futbollin e ndien çdo ditë. Tani që ka mbaruar, nuk jam penduar”, ka rrëfyer Varan.
PANORAMASPORT.AL
