AC Milan po përballet me kritika të forta për mënyrën se si po menaxhon merkaton e transferimeve, ndërsa trajneri Ruben Amorim ende nuk e ka marrë përforcimin e plotë që i ishte premtuar.
Andrea Longoni ka ngritur shqetësimet e tij për situatën në klubin kuqezi, teksa kanë mbetur vetëm dy javë nga starti i sezonit të ri. Sipas gazetarit italian, premtimet e bëra nga pronari Gerry Cardinale dhe drejtuesit e Milanit ndaj Amorimit nuk janë përmbushur deri më tani.
Amorim u emërua trajneri i ri i Rossonerëve në mesin e muajit qershor. Rreth një javë më vonë, pas një periudhe vlerësimi të gjatë, klubi konfirmoi strukturën e re drejtuese, duke u mbështetur kryesisht te promovimet e brendshme.
Milan e nisi merkaton me ritëm, duke siguruar transferimet e Goncalo Ramos nga PSG dhe Mario Gila nga Lazio. Megjithatë, pas këtyre lëvizjeve, aktiviteti i klubit në treg është ngadalësuar ndjeshëm.
Longoni: Premtimet nuk janë mbajtur
Në editorialin e tij të fundit për MilanNews, Andrea Longoni kritikon ashpër drejtuesit e Milanit, duke vënë në dukje se klubi kishte premtuar që Amorimi do ta kishte sa më shpejt në dispozicion një skuadër të kompletuar.
“Merkatoja. Cardinale e nisi me fishekzjarre, por duket se tani nuk ka as fishekzjarre të vegjël në duar. Është e habitshme që edhe një herë premtimet e tij nuk janë përmbushur, të paktën deri tani”, shkruan Longoni.
Ai paralajmëron se dy javët e fundit të merkatos do të jenë vendimtare për Milanin.
“Duhet të ndezë një ton fishekzjarre në dy javët e fundit, përndryshe rrezikojmë të shohim një tjetër sezon të vështirë, për ta thënë butë.”
Longoni rikujton gjithashtu se Milani vjen pas një sezoni ku përfundoi në vendin e tetë dhe një tjetër në vendin e pestë, çka sipas tij e bën të domosdoshëm një përmirësim të ndjeshëm të skuadrës.
“Një nga premtimet e bëra Amorimit dhe të ndara me mediat një muaj e gjysmë më parë ishte dëshira për t’ia dorëzuar trajnerit një skuadër të plotë sa më shpejt, në mënyrë që të mos përsëriteshin gabimet e së kaluarës.”
Në fund, gazetari italian është i prerë në vlerësimin e tij: “Nga ky këndvështrim, objektivi ka qenë një dështim i plotë.”
Tashmë, presioni është mbi drejtuesit e Milanit. Me vetëm dy javë në dispozicion, klubi duhet të përshpejtojë lëvizjet si në hyrje, ashtu edhe në dalje, nëse dëshiron që Amorim të nisë sezonin me një skuadër konkurruese.
