Arne Slot pranon se Liverpuli i tij u dominua nga Njukasëlli në finalen e Kupës Karabao, ndërsa lojtarët e tij vuajtën që të mbajnë ritmin e kundërshtarit.
Trajneri holandez tha përpara ndeshjes se ai priste një përballje fizike, por edhe nëse ai ka qenë i mahnitur nga intensiteti i kundërshtarit, të kuqve u mungoi ritmi dhe një plan kundër një skuadre të fortë dhe shumë të motivuar. Por Slot refuzoi që të fajësonte 120 minutat e së martës kundër PSG-së për zhgënjimin në Kupën Karabao.
“Kjo ndeshje nuk kishte të bënte me vrapimin”, tha trajneri i Liverpulit pas ndeshjes.
“Kjo ndeshje kishte të bënte vetëm me duelet dhe nuk kishte fare intensitet në drejtim të vrapimit. Pra, nuk mund ta gjykoni nëse ishim të lodhur ose jo fizikisht, sepse ne nuk mund të ushtronim presing. Ju mund të gjykoni një ekip nëse është i lodhur, nëse bën presing. Por nuk kishte asgjë për të presuar. Ndeshja ishte e ngadaltë dhe shkoi pikërisht atje ku ata donin që të shkonte: ishte një luftë me shumë duele. Nëse ne luajmë në duelet ajrore me tyre 10 herë, ata do të fitojnë 9, sepse janë më të fortë se ne. Jemi të zhgënjyer me lojën dhe ndihem krejtësisht i zhgënjyer nga ndeshja me PSG-në. Dy humbje radhazi ne i bëjmë për herë të parë, por mendoj se kjo ka të bëjë me lodhjen në fundin e sezonit”.
PANORAMASPORT.AL
