Klubi i Juventusit po bëhet gati për firmën më të rëndësishme të këtij sezoni. Nesër në klub pritet nënshkrimi i një kontrate nga e cila merr rrugë skuadra e re e bardhezinjve, pasi Kristiano Xhiuntoli do të zyrtarizohet si drejtori i ri sportiv.
Xhiuntoli, i cili ndërtoi Napolin e mrekullive me nuhatje të jashtëzkonshme në merkato, u ka dhënë lamtumirën kampionëve të Italisë dhe tashmë do të zbarkojë te bardhezinjtë, me qëllimin për t’i kthyer te lavdia e disa viteve më parë. Pasi prishi kontratën që i kishte mbetur në vitin e fundit me Napolin, “Sky Sport” raporton se nesër ai do të jetë në Torino për të hedhur të zezë mbi të bardhë.
Marrëveshja e tij me torinezët do të jetë 5-vjeçare dhe që në ditën e parë, parashikohet që të organizohet një takim i mirëfilltë për strategjinë e merkatos së klubit. Alegri pritet të jetë gjithashtu pjesëmarrës sa i përket planifikimit të merkatos, si sa u përket emrave në hyrje, ashtu edhe atyre në dalje, meqë ka interes për disa elementë të bardhezinjve.
PANORAMASPORT.AL
