Kryetari i Federatës së Futbollit të Kosovës (FFK) Agim Ademi ka zhvilluar një takim me mesfushorin Bersant Celina.
Njësoi si Arbër Zeneli, edhe Celina kishte disa keqkuptime me FFK-në, por duket se edhe kjo situatë është zgjidhur.
Ademi përmes një shkrimi në rrjetin social “Facebook” konfirmoi takimin me mesfushorin ofansiv, ndërsa shtoi se kontributi i këtij të fundit nuk do të harrohet asnjëherë te Kosova.
“Me Bersant Celinën, djaloshin që la Norvegjinë për të veshur fanellën e Kosovës.
Që në moshën 16-vjeçare u paraqit me Kombëtaren U21 në ndeshjet zyrtare, ndërsa vetëm një vit më vonë ishte në ekip me Kombëtaren A, në miqësoren historike Kosovë – Haiti, të zhvilluar në Mitrovicë.
Talenti i Manchester City-t, i njohur për teknikën e tij të jashtëzakonshme, u bë shpejt idhulli i tifozëve “Dardanët”. Jemi mirënjohës që, ndonëse kishte vështirësi në komunikim në gjuhën shqipe, Bersanti pa asnjë hezitim zgjodhi Kosovën me zemër. Për ne, ai ka një rol të veçantë në ndërtimin e kësaj Kombëtareje dhe kontributi i tij do të vlerësohet gjithmonë.
Pasi kaloi një periudhë të vështirë me lëndime dhe ndërrime klubesh, Bersanti tashmë është rikthyer fuqishëm, duke na kujtuar magjinë e tij të zakonshme në fushën e gjelbër.
Kënaqësi biseda dhe qëndrimi me djaloshin të cilit që nga dita e parë zemra i ka rrahur vetëm për Kosovën”, shkroi ai.
Ndërkohë, Celina kishte deklaruar javën e kaluar se ishte afër të ftohej te Kosova në muajin shtator, kurse shpreson të jetë me ekipin për muajin tetor ndaj Sllovenisë, respektivisht Suedisë.
