Junus Musah është prezantuar sot si blerja më e re e Milanit. Mesfushori ka firmosur kontratën deri në vitin 2028 me kuqezinjtë dhe menjëherë më pas ka dhënë edhe intervistën e parë për mediat e klubit.
“Jam shumë i lumtur. Do më dhembë goja për sa shumë po qesh. Dua t’i falënderoj të gjithë. Duhet të kuptoj ende se çfarë ka ndodhur, por jam shumë i lumtur”, ishin fjalët e tij të para si futbollist i kuqezinjve, teksa ka shpalosur “njohuritë” e tij për klubin.
“Ka shumë lojtarë që më pëlqenin, si Sedorf, Pato, Ronaldinjo… Vëllai im është tifoz me Milanin, ndaj e ndjek Milanin për këtë arsye. Fanella me numrin 80? Pashë që ishte numër i lirë. Më kujtohet që e ka përdorur Ronaldinjo, do të jetë speciale të përdor fanellën e tij.
Gatuzo? Kam folur me të kur ishim bashkë te Valencia. Duke u tallur me tha që ndoshta ndonjë ditë do të luaja edhe unë te Milani. Dhe shihni tani”, tha mesfushori amerikan i kuqezinjve.
PANORAMASPORT.AL
