Dy vite më parë, Bournemouthi arriti një fitore të lehtë 3-0 ndaj United-it të Amorimit në “Old Trafford”, duke i lënë tifozët e “Djajve të Kuq” të tërbuar. Huijsen hapi serinë e golave me një goditje me kokë pas një goditje standarde – një tjetër makth për United-in në këtë aspekt.
Një javë më parë, ishte Gvardiol ai që shënoi në derbi, përpara se të niste një përmbysje e udhëhequr nga Bruno Fernandes dhe Diallo. Në Mançester, zhgënjimi kishte arritur kulmin: shumë gola të pësuar nga goditjet standarde, çka solli një valë kritikash ndaj Carlos Fernandesit – ndihmësit të Amorimit dhe personit përgjegjës për taktikat në këto situata.
“Përgjegjësia për gjithçka bie mbi mua, jo mbi Carlosin. Nuk humbëm për shkak të goditjeve standarde”, tha Ruben, duke dalë në mbrojtje të ndihmësit të tij. Kjo ndodhi në dhjetor të vitit 2024. Sot, situata duket krejtësisht ndryshe. Goli i Rabiot në derbi erdhi pikërisht nga një ide e Fernandes. Dhe jo, kjo nuk është rastësi.
KUSH ËSHTË FERNANDES? — Carlos është një portugez 31-vjeçar, i cili dikur ka luajtur futboll amator për ekipin e Caneças. Megjithatë, karriera e tij si lojtar nuk mori kurrë hov. Siç duket, ai e kuptoi herët se çfarë donte të bënte: në moshën 14-vjeçare, vendosi se dëshironte ta përjetonte futbollin nga stoli, e jo në fushë. Fundi i karrierës si lojtar – fillimi i rrugëtimit si trajner.
Ai e nisi karrierën në sektorin e të rinjve të Benficës, pikërisht në vitet kur Amorimi luante për këtë klub. Të dy u takuan për herë të parë në Seixal, qendrën stërvitore të klubit portugez. Biseduan, shkëmbyen pikëpamje, ndanë ide – dhe mes tyre lindi menjëherë një kimi e veçantë.
Kur Ruben u tërhoq nga futbolli i luajtur dhe nisi rrugëtimin e tij si trajner te Casa Pia, në divizionin e tretë, në vitin 2018, ai mori me vete edhe Fernandes – fillimisht si praktikant pa pagesë. Që aty, lidhja mes tyre u forcua dhe Carlos u bë një figurë gjithnjë e më kyçe në stafin e Amorimit, duke fituar përfundimisht rolin e ndihmëstrajnerit.
Braga, Lisbona, Mançesteri dhe tani Milano: qytetet ndryshojnë, numri i trofeve shtohet (gjashtë të fituar së bashku), por të dy mbeten të pandarë. Është një lloj “martese futbollistike” – me më pak foto në Instagram, por me shumë më tepër skema taktike të vizatuara në tabelën e bardhë.
“MINI MOURINHO” — Carlos nuk është thjesht një specialist i goditjeve standarde. Ai bën shumë më tepër: përgatit seancat stërvitore, studion kundërshtarët së bashku me analistët e ndeshjeve, harton skema taktike dhe konsultohet me Amorim çdo ditë.
Gjatë kohës së tij te Sporting, Ruben foli me shumë vlerësim për zëvendësin e tij: “Numri im dy është Carlos Fernandes; ai ka qenë krahu im i djathtë që nga dita e parë. Ai do të bëhet një trajner më i mirë se unë”. Madje, ai bëri edhe një krahasim domethënës: “Shpesh them se, nëse unë do të bëhesha si Bobby Robson, ai do të ishte José Mourinho im. Por ka ende kohë për këtë”.
Amorim sheh diçka të veçantë tek ai – aq sa e imagjinon që një ditë të marrë drejtimin e një skuadre të tijën. Për momentin, megjithatë, të dy vazhdojnë të ndajnë stolin, idetë dhe sukseset.
NJË PËRQAFIM GJATË DERBIT — Një pasqyrim i marrëdhënies së tyre u pa gjatë derbit: kur Rabiot shënoi pas një skeme nga goditja e këndit, gjëja e parë që bëri Amorim ishte të kthehej nga Carlos për ta përqafuar.
Pas ndeshjes, Musah sqaroi: “Rabiot nuk donte të godiste portën; topi duhej të shkonte drejt shtyllës së largët. E kishim punuar këtë gjatë javës”. Me pak fjalë, ishte një skemë që funksionoi vetëm pjesërisht, por që dëshmonte qartë se kishte pasur studim dhe përgatitje. Ky Carlos duhet të ketë vërtet diçka “të veçantë”.
