Prekja e topit me dorë nga Samuele Ricci në minutat shtesë të derbit të fituar nga Milani ndaj Interit ishte episodi kryesor i analizuar në emisionin “Open VAR” në DAZN, me pjesëmarrjen e Mauro Tonolini nga “Associazione Italiana Arbitri”. Ndeshja u drejtua nga Daniele Doveri, ndërsa në dhomën VAR-it ishin Rosario Abisso dhe Marco Di Bello.
Në audio dëgjohet Doveri të thotë: “Gjoks, asgjë, asgjë, krejt natyrale”. Kontrolli zgjati vetëm 10 sekonda dhe arbitri u përgjigj menjëherë ndaj protestave të Francesco Pio Esposito: “Po ku? Është kështu, po luan futboll”.
Sipas Tonolini, vendimi ishte i saktë: “Nuk kemi asnjë dyshim. Krahu është në pozicion natyral, Ricci bën një lëvizje për ta larguar dhe, edhe sikur ta hiqte dorën, topi do të përfundonte gjithsesi në gjoksin e tij”.
Ai kujtoi edhe rastin e Denzel Dumfries në Napoli–Inter, sezonin e kaluar, gjithashtu i konsideruar jo penallti. Ndryshe ishte rasti i Yann Bisseck në Inter-Lazio, kur penalltia e shënuar nga Pedro Rodríguez erdhi sepse mbrojtësi rriti vëllimin e trupit me krahun, gjë që nuk ndodhi në episodin me Ricci.
