Kampioni i Kosovës, Drita, e ka mbyllur pjesën e parë me epërsi 2:1 ndaj Differdange në ndeshjen e kthimit të raundit të parë kualifikues të Ligës së Kampionëve.
Sulmuesi Arb Manaj realizoi dy herë për gjilanasit, në minutat 4′ dhe 17′, duke përfituar nga reagimet e dobëta të mbrojtjes dhe portierit të skuadrës nga Luksemburgu.
Differdange u rikthye në lojë në minutën e 28-të, kur Brusco shënoi me kokë pas një goditje nga këndi.
Vendësit shtuan presionin në minutat e fundit të pjesës së parë në kërkim të barazimit, por Maloku intervenoi mirë në disa situata.
Skuadrat shkuan në pushim me rezultatin 2:1 për Dritën, që është në rrugë të mbarë për të shkruar histori si skuadra e parë nga Kosova që kalon në raundin e dytë të Ligës së Kampionëve.
