Përfundoi me rrjeta të paprekura derbi i pazakontë i kryeqytetit, Tirana – Dinamo, i zhvilluar në stadiumin “Flamurtari” të qytetit të Vlorës. Dy gola të anuluar, një për secilën skuadër, e dy traversa të Prengajt e bënë tepër emocionuese pjesën e dytë të kësaj ndeshjeje, por në fund skuadrat ndanë nga një pikë.
Pas një pjese të parë të ekuilibruar dhe me raste sporadike, Prengaj i Tiranës në minutën e 53-të lëshon një gjuajtje të fortë, por traversa i mohon festën e golit sulmuesit të bardhebluve.
Pesë minuta më vonë, bardheblutë tundin rrjetën e Dinamos me Soler, që u tregua i saktë me një roveshatë, por pas ndërhyrjes së sistemit VAR goli u anulua për pozicion jashtë loje gjatë aksionit.
Në të 71’, Zabërgja nga e djathta nis një pasim në qendër, që devijohet nga Selmani, teksa Vila shtyn sferën në rrjetë. Por goli është i pavlefshëm për pozicion jashtë loje.
Tjetër traversë e Prengajt! Sulmuesi, i pafat, sheh përsëri topin të kthehet nga shtylla e sipërme e portës së Teqjes pas një aksion të bukur të bardhebluve.
Asgjë nuk ndryshoi deri në fund të ndeshjes, me rezultatin që mbeti me rrjeta të paprekura.