Paulo Dybala dhe bashkëshortja e tij, Oriana Sabatini, kanë ndarë me botën lajmin më të bukur: së shpejti do të bëhen prindër të një vajze. Çifti e zbuloi emocionin e madh me një video të publikuar në rrjetet sociale, ku tregojnë momentin pas ekografisë që konfirmoi gjininë dhe gjendjen e mirë shëndetësore të foshnjës. “Postimi ynë i parë të tre”, shkroi Oriana, e cila në korrik i tha “po” futbollistit në një martesë romantike pas propozimit të paharrueshëm të Dybalas në Fontana di Trevi.
Videoja prekëse ka marrë mijëra pëlqime dhe urime nga tifozë, shokë e ish-shokë skuadre të sulmuesit argjentinas, mes tyre Morata, De Paul, Cuadrado e Soulè. Dybala vetë shtoi një histori simbolike me një baba që sodit një fëmijë në djep.
Historia e dashurisë së tyre nisi në vitin 2018, kur Paulo luante për Juventusin. Oriana, atëherë, nuk e njihte futbollistin dhe iu desh t’i kërkonte babait të saj, tifoz i madh i River Plate, informacion para se të pranonte një takim. Më vonë, Sabatini u bë një mbështetje vendimtare për Dybalan, madje e bindi të refuzonte një ofertë të majme nga Arabia për të qëndruar në Romë.
Tani, “La Joya” është rikthyer në stërvitje me objektivin për të qenë gati ndaj Fiorentinës, ndërsa pret me padurim dhuratën më të çmuar: lindjen e vajzës së parë në mes të shkurtit. Një gëzim i dyfishtë për ‘yllin’ e Romës, që po përjeton kapitullin më të lumtur të jetës së tij.
