Telashe në horizont për Lukas Paketa. Federata Angleze e Futbollit po mendon ta përjashtojë përjetësisht nga futbolli pasi ka ndikuar bastet me veprimet që ka kryer, duke u ndëshkuar me karton të verdhë në mënyrë të qëllimshme.
Sipas “The Sun”, në dokumentin e hetuesve të Federatës Angleze rreth shkeljeve të futbollistit të Uest Hem i cili ka luajtur më parë për Milanin e Lionin, ekziston sugjerimi që të përjashtohet përgjithmonë nga futbolli. Të dhënat e inspektorëve, tregojnë se në ishullin e Paketa në Brazil, vendlindjen e tij, janë vënë baste me shuma të vogla për të mos rënë në sy për ndëshkimin e tij me karton të verdhë në ndeshjet ku ka ndodhur një gjë e tillë, me fitime që kanë arritur 100 mijë paund.
Si për ironi të fatit, një kompani bastesh që është sponsor i klubit të Uest Hem, është ajo që ka sinjalizuar për parregullsitë, duke ngritur alarmin dhe duke shpërndarë të dhënat që tashmë fundosin Paketa.
Sipas rregullave të FIFA-s, nëse një Federatë e caktuar ndëshkon një lojtar për çështje të tilla, dënimi bëhet menjëherë global, gjë që do të mbyllte përfundimisht karrierën e mesfushorit të Uest Hem dhe Brazilit.
PANORAMASPORT.AL
