Polemikat rreth gjyqtarëve të futbollit në Itali nuk kanë kurrë fund dhe as ndërthurja e sistemit VAR nuk ka qetësuar situatën. Gjyqtarët akuzohen vazhdimisht nga klube të ndryshme se ndikojnë ndeshjet në një mënyrë apo tjetër dhe duket se edhe vetë “xhaketat e zeza” janë të ndërgjegjshme për atë që ndodh.
Kjo është arsyeja se pse një prej gjyqtarëve të Serisë A, ka vendosur që të flasë për herë të parë publikisht në historinë e futbollit italian, në një nga emisionet më të famshëm televiziv për investigime, “Le Iene”.
“Ekskluzivisht dhe për herë të parë në historinë e futbollit italian, një gjyqtar i Serisë A ka vendosur që të bëjë disa deklarata për mikrofonin e Filipo Roma, duke denoncuar ato që për të janë anomali të rënda në sistemimin e gjykimit në Itali”, shkruhej në një komunikate të shpërndarë për mediat nga producentët e emisionit të njohur, i cili serinë e radhës e ka më datë 23 janar dhe do të transmetohet nga televizioni “Italia 1”.
PANORAMASPORT.AL
