Një sezon për t’u mbajtur mend me fanellën e Bërnmuthin, i pari i tij në Premier Ligë dhe të gjithë sytë janë mbi të. Dean Huijsen në mars mori thirrjen e tij të parë në ekipin kombëtar spanjoll të Luis de La Fuente dhe së shpejti do të bëhet lojtar i Real Madridit. 
Mbrojtësi, pasi u largua nga Juventusi verën e kaluar për 15 milionë euro plus tre milionë euro në bonuse, do të jetë blerja e dytë e madrilenëve, pas Trent Alexandër-Arnold, të cilët po kërkojnë përforcime për repartin e tyre të mbrojtjes në prag të Kupës së Botës për Klube.
Sipas ekspertit të merkatos, Fabricio Romano, Huijsen është aktualisht në Madrid për t’iu nënshtruar testeve mjekësore me klubin e tij të ri. Ai do të nënshkruajë një kontratë 5-vjeçare dhe Reali do ti paguajë klubit anglez 50 milionë paund për të riun.
20-vjeçari e filloi sezonin 2024-2025 me Bërnmuthin dhe ka luajtur si një titullar pothuajse i palëvizshëm, duke u shfaqur në fushë në 27 ndeshje, përveç një paraqitjeje në Kupën FA dhe një në Kupën EFL, për një total prej 29 ndeshjesh dhe 2,441 minutash të luajtura. Ai kontribuoi edhe në fazën ofensive me 3 gola në Premier Ligë.
PANORAMASPORT.AL
