Çabi Alonso është kthyer në një kohë shumë të shkurtër në një nga trajnerët më të kërkuar në Eruopë. Klubet e mëdha po monitorojnë punën e ish-mesfushorit të shquar spanjoll, i cili ka bërë mrekulli në vitin e tij të parë te Bajer Leverkusen, duke transformuar plotësisht skuadrën.
Disa prej klubeve më të mëdha kishin piketuar trajnerin dhe mendonin që të hidhnin një hap për të në të ardhmen. Por Bajer Leverkusen i ka dalë punës para dhe sot ka bërë të ditur se ka rinovuar kontratën me trajnerin.
Çabi Alonso ka nënshkruar marrëveshjen e re deri në vitin 2026 dhe tashmë do të jetë në detyrë që nga starti i sezonit, ndryshe nga edicioni i kaluar kur e mori drejtimin në tetor, me skuadrën që luftonte për mbijetesë. Në fund të sezonit, Leverkuseni ia doli që të siguronte Europën me vendin e 6 në klasifikim, teksa tekniku mori merita për skuadrën me futboll argëtues që kishte krijuar.
“Jam shumë mirënjohës për besimin që Bajer ka tek unë. E shoh sezonin e kaluar si pozitiv, por dëshiroj më shumë, ashtu si edhe klubi. Për këtë arsye, do të vazhdojmë të punojmë me vendosmëri”, theksoi Çabi Alonso pas firmës.
PANORAMASPORT.AL
