Ndeshja kryesore e kampionatit të Angolës u shndërrua në një betejë gjyqësore jashtë fushës, pasi vetëm njëra skuadër u paraqit në stadium, ndërsa tjetra shkoi gabim në “vendin e ndeshjes”. Sfida mes 1° de Agosto dhe Petro de Luanda përfundoi me një vendim që premton polemika të mëtejshme.
Problemi nisi nga protesta e 1° de Agosto, e treta në renditje, që nuk pranoi vendimin e federatës angoliane për ta zhvendosur ndeshjen nga stadiumi i tyre, “França Ndala”, në “11 de Novembro”, stadium i përdorur zakonisht nga rivalët.
Si pasojë, 1° de Agosto qëndroi në stadiumin e vet, ndërsa Petro de Luanda zhvilloi ngrohjen, doli në fushë me arbitrat dhe pas kohës së caktuar pritjeje mori fitoren 3-0 në tavolinë për mungesën e kundërshtarëve. Ngjarja u zhvillua në një atmosferë surreale, me pak tifozë në stadium, por lojtarët festuan megjithatë me ta.
