Lionel Mesi ka qenë sot protagonist i një aventure të pakëndshme, teksa ka udhëtuar drejt Kinës për të marrë pjesë në një ndeshje miqësore me përfaqësuesen e tij ndaj Australisë që luhet në vendin aziatik. Futbollisti është ndaluar në aeroport nga policia kineze, e cila ka konstatuar se ai po hynte në mënyrë të paligjshme në vend.
Mesi kishte udhëtuar drejt Pekinit për t’iu bashkuar grumbullimit me avionin e tij privat. Bashkë me të ishin edhe truprojat si dhe disa shokë, mes të cilëve edhe Angel Di Maria. Por sapo ka shkelur në aeroport, ai është ndaluar nga policia vendase.
Arsyeja ishte se Mesi kishte udhëtuar për këtë sfidë me pasaportën e tij spanjolle dhe jo atë argjentinase, i bindur se ishte e vlefshme për të kaluar pa probleme në kufi, ashtu siç kishte ndodhur në Tajvan.
Por kjo pasaportë nuk është e vlefshme për udhëtimet pa vizë në Kinë, ndaj atij i është dashur të presë për rreth dy orë në aeroport, derisa autoritetet vendase e kanë pajisur me vizën përkatëse për të hyrë në territorin e vendit dhe për t’iu bashkuar pjesës tjetër të Kampionëve të Botës.
PANORAMASPORT.AL
