Fransisko Konseisao është në prag të një jave që mund të përcaktojë jo vetëm fatin europian të Juventusit, por edhe të ardhmen e tij personale në klubin bardhezi.
I ardhur nga Porto si një driblues i lindur, një lojtar që premtonte të sillte vrull dhe kreativitet në sulmin e Juventusit, portugezi ka kaluar një sezon me ulje-ngritje, ku shkëndijat fillestare janë shuar nga dëmtimet, mungesa e vazhdimësisë dhe ndryshimet taktike. Nën drejtimin e Igor Tudorit, fillimi nuk ishte premtues.
Pas ndeshjes me Leçen, Konseisao u kritikua ashpër së bashku me disa prej zëvendësuesve të tjerë. Megjithatë, reagimi i tij në sfidën e radhës ndaj Parmës ndryshoi perceptimin e trajnerit kroat, duke e kthyer atë në një kandidaturë serioze për një vend titullari në dy sfidat kyçe që presin Juventusin, kundër Bolonjës dhe Lacios.
Këto dy përballje pritet të jenë vendimtare për fatin e klubit në garat europiane. Një vend në Champions do të përkthehej në qetësi ekonomike dhe prestigj, ndërsa Liga e Europës do të nënkuptonte një tjetër verë me pikëpyetje dhe reduktim ambiciesh. Në këtë skenë të tensionuar, mungesa e Jildiz për shkak të pezullimit i ka hapur Konseisaos një derë që ai duhet ta shfrytëzojë me çdo kusht.
Edhe pse rendimenti i tij ka qenë në rënie, statistikat flasin ende në favor të Konseisaos. Ai kryeson ndaj Jildiz në disa tregues për çdo 90 minuta, më shumë goditje në portë (2.7 ndaj 2.3), më shumë driblime (2.6 ndaj 2.2) dhe një produktivitet të ngjashëm në gola (0.2 për ndeshje). Por diferenca qëndron në impaktin e përgjithshëm që Jildiz ka pasur në lojën e skuadrës – një fushë ku portugezi duhet ende të bindë.
PANORAMASPORT.AL
