Interi tregon muskujt në Europë. Mesazhi ishte dërguar tashmë si përmes vendit të parë aktual në renditjen e Serisë A (20 fitore në 24 javë) dhe përmes fazës së grupeve të Ligës së Kampionëve që përfundoi pa humbje (por në vendin e dytë pas Real Sociedadid).
Megjithatë, shumë prisnin që zikaltrit të përballeshin me provën e së vërtetës ndaj Atletikos së Madridit, një prej skuadrave më të vështira për tu përballur për shkak të futbollit të “larmishëm” që shpreh. Në sajë të performancës së ofruar dhe fitores, e cila ishte shumë më e ngushtë sesa sasia e lojës dhe mundësitë e krijuara. Sidoqoftë, Lautaro me shokë padyshim e kaluan provën. Tani jo vetëm që do të shkojnë në Madrid për të luajtur për kualifikimin në çerekfinale, duke qenë në gjendje të llogarisin në dy rezultate nga tre, por do ta bëjnë këtë pasi të kenë përgënjeshtruar ata që konsideruan rrugën e shkëlqyer europiane të 2022-23 si pasojë e një ecurie më rivalë jo të pamundur (Porto në 1/8, Benfika në çerekfinale, Milan në gjysmëfinale). Në garën për kupën me veshë të mëdhenj është edhe Interi, i cili nuk mbërriti rastësisht në Stamboll dhe që tashmë ka vënë syrin te “Uembleit”, stadiumi i finales së 1 qershorit.
MUR ZIKALTËR – Atletiko e Madridit nuk kishte humbur kurrë në “San Siro” dhe të martën Interi fitoi në një mënyrë shumë më të qartë se sa sugjeron rezultati final 1-0. Lino iu afrua golit në disa raste, por Zomer nuk i ndoti kurrë dorezat, ndërkohë që duhet thënë se “Los Colchonero” përfunduan sfidën me zero goditje në kuadrat. Paaftësi e tyre? Absolutisht jo. Edhe një herë Inzagi tregoi një mbrojtje të hekurt dhe për herë të 21-të në 34 ndeshjet zyrtare të këtij sezoni 2023-24 e mbajti portën e tij të paprekur. Në Champions ndodhi në 4 nga 7 ndeshje. Shumë indicie për të vazhduar të flasim për një rastësi. Dhe trajneri zikaltër është edhe më i kënaqur që soliditeti në fazën pas top u rikonfirmua në një natë ku mungonte një prej… pretorianëve të tij, Françesko Açerbi që u dëmtua në fitoren ndaj Romës dhe që Inzagi shpreson të rikthehet pas një jave kundër Atalantës.
NËNTË RADHAZI — Interi tani ka nëntë fitore nga nëntë ndeshje të luajtura në këtë fillim të 2024-s. I fundit që pati sukses në një seri të ngjashme ishte Conte, nga shkurti deri në prill 2021. Disa ditë përpara se të festonte skudeton. As në ëndrrat e tij më të çmendura, Inzagi nuk mund ta imagjinonte një fillim kaq perfekt të vitit të ri. Gjithashtu sepse viti 2023 përfundoi me një paraqitje pa emocione ndaj Xhenoas. Në shtabin e përgjithshëm zikaltër kishte një aluzion shqetësimi për shumë ndeshje të mëdha që skuadra do t’i duhej të përballte midis kampionatit (Juventus, Fiorentina dhe Roma), Superkupës së Italisë (Lacio dhe më pas Napoli) dhe Ligës së Kampionëve (Atletiko Madrid). Ja që Lautaro me shokë u përgjigjën në mënyrë të shkëlqyer: në momentin më të vështirë treguan muskujt dhe në 7 ndeshjet e fundit, në të gjitha garat, kanë pësuar vetëm një gol ndaj Romës.
PANORAMASPORT.AL
