Fitorja e Interit ndaj Juventusit në “Derbin e Italisë” ka sjellë elozhe për skuadrën e drejtuar nga Simone Inzagi e cila mundi me vetëm një gol bardhezinjtë, por dominoi pjesën më të madhe të ndeshjes. Edhe Fabio Kapelo u është bashkuar atyre që mendojnë se Interi ishte superior ndaj Juventusit dhe e tregoi qartësisht në fushën e lojës.
“Interi ishte dominues në mesfushë. Cilësia e Çalhanollu dhe e mesfushorëve të tjerë ishte ajo që bëri diferencën. Reparti i zikaltërve është i kompletuar dhe shumë i fortë, rikuperojnë topin, tregojnë cilësitë e tyre dhe janë të rrezikshëm në zonën e golit.
Bardhezinjtë vuajtën edhe Dimarkon në krahun e majtë. Skuadra e Inzagit ndryshoi marsh edhe falë zëvendësimeve, duke treguar se ka një grup lojtarësh më të gjerë dhe superior në nivelin teknik”, theksoi Kapelo për mediat italiane.
PANORAMASPORT.AL
