Transferimi i Kylian Mbappésw te Reali i Madridit ishte lëvizja më e madhe e merkatos së verës së kaluar, por fillimi i aventurës së tij në kryeqytetin spanjoll nuk ka qenë i lehtë për francezin.
Me 9 gola në 18 ndeshje, paraqitjet e sulmuesit nuk kanë bindur tifozët e “Los Blancos”, dhe performanca e tij kundër Liverpoolit (humbje 2-0) ka shtuar kritikat ndaj tij.
Golat u shënuan vetëm në pjesën e dytë, por “të kuqtë” treguan efikasitet duke shfrytëzuar mesfushën e dobët të Realit dhe duke neutralizuar Mbappénë dhe Bellinghamin.
Një nga zërat kritikë ishte Steven McManaman, ish-lojtar i Realit të Madridit dhe Liverpoolit, tani komentator për TNT Sports, i cili kritikoi ashpër performancën e Mbappésë në Anfield:
“Këtë natë kishin nevojë për të. Pa Vinícius dhe disa nga ‘yjet’ e tjerë, ai na zhgënjeu të gjithëve. Ky ishte momenti i tij ‘penalltia e humbur’.”
Ai shtoi:
“Shtypi do të jetë i pamëshirshëm me Kylianin, sepse ai përsëri nuk u shfaq kur ishte e nevojshme. Reali i Madridit po kalon një periudhë të vështirë dhe lojtarët kryesorë nuk po luajnë mirë. Kjo vetëm e përkeqëson situatën. Vinícius nuk është, por a do të shfaqet Kyliani? Jo, nuk do të shfaqet.”
McManaman gjithashtu tha se ish-lojtari i Monakos dhe PSG-së nuk është një “numër nëntë i vërtetë” dhe se Reali duhet të kishte mbajtur sulmuesin Joselu”, i cili ishte një nga heronjtë e fitimit të Ligës së Kampionëve sezonin e kaluar, përpara se të transferohej në Ligën Saudite.
