Klubi kampion i Australisë, Melbourne City, ka zyrtarizuar sot afrimin e futbollistit të kombëtares së Kosovës, Elbasan Rashani, për sezonin 2025/26 në Isuzu UTE A-League.
32-vjeçari do të jetë pjesë e skuadrës që synon mbrojtjen e titullit kampion dhe përfaqësimin dinjitoz në AFC Champions League Elite, kompeticion kontinental ku City do të marrë pjesë këtë edicion, transmeton lajmi.net.
Rashani vjen nga Spanja, ku sezonin e kaluar ishte pjesë e Elche CF, duke kontribuar në ngjitjen historike të skuadrës në La Liga për sezonin 2025/26.
I njohur për shkathtësinë dhe përvojën e madhe në krahët e sulmit, Rashani ka mbi një dekadë karrierë në futbollin evropian, ku ka luajtur për klube si Brøndby (Danimarkë), Rosenborg (Norvegji) dhe Clermont (Francë). Me Rosenborg, ai ka fituar katër trofe, përfshirë dy tituj kampionë të Norvegjisë.
Ai është gjithashtu një prej emrave më të njohur në përfaqësuesen e Kosovës, me 29 paraqitje dhe 5 gola, shpesh në krah të ish-yllit të Melbourne City, Valon Berisha.
Ky transferim shihet si një përforcim kyç për Cityn, në prag të një sezoni sfidues si në kampionatin vendor, ashtu edhe në arenën ndërkombëtare./lajmi.net/
