Ermal Krasniqi, futbollisti i ftuar te Kombëtarja e Kosovës në futboll për ndeshjet e muajit qershor ka folur para takimit të rëndësishëm me Rumaninë.
“Dardanët” do të ndeshen me Rumaninë sonte me fillim nga ora 20:45 në stadiumin “Fadil Vokrri”, në kuadër të Grupit I të kualifikimeve.
Krasniqi është shprehur i lumtur që do mund ta përfaqësojë Kosovën dhe ka premtuar maksimumin që të fitojë kundër Rumanisë, nëse i jepet rasti të jetë në fushën e lojës.
“Sigurisht, jam shumë i lumtur që përfaqësoj vendin tim. Na pret një ndeshje shumë e rëndësishme. Është një ndjenjë e veçantë, edhe nëse luaj për një ekip nga Rumania, do të bëj gjithçka që Kosova të fitojë. U gëzova që i pashë. Jam i sigurt që ndihen mirë këtu, janë të mirëpritur”, deklaroi Krasniqi për mediumin rumun “As.ro”, transmeton lajmi.net.
“Për këto dy ndeshje më thirri përzgjedhësi. Nëse do të luaj apo jo, është vendimi i trajnerit. Dhe nëse kam disa minuta, do të jap gjithçka. Përzgjedhësi e ka analizuar shumë mirë Rumaninë, nuk kam folur shumë me të. Përzgjedhësi ynë e ka përgatitur taktikën për Rumaninë”, shtoi ai.
Ermal Krasniqi është pjesë e klubit të Superligës së Rumanisë, CFR Cluj që kur iu bashkua nga Ballkani në janar të këtij viti./Lajmi.net/
