Me gjithë grintën nga Sharl Lëklerk, ajo nuk ishte e mjaftueshme për të përsëritur suksesin e vitit të kaluar në Montekarlo.
Piloti i Ferrarit u rendit në vend të dytë, duke shënuar podiumin e dytë sezonal për skuadrën italiane, pas pozicionit të tretë që kishte regjistruar në Arabinë Saudite.
27- vjeçari e dinte se në pistën qytetase të Monakos do të ishte pothuajse e pamundur ta rrëzonte Lando Norris nga vendi i parë. Kjo është arsyeja pse monegasku ishte aq i zhgënjyer pasi humbi pozicionin e parë të shtunën në kualifikuese me një të dhjetën e sekondës.
Një cirkuit ku parakalimi në rrugët e ngushta të Principatës konsiderohej i pamundur që në kohën e duelit legjendar në vitin 1992 mes Airton Senës dhe Najxhëll Mansëll, e jo më tani që makinat janë bërë shumë më të gjata.
Por vendi i dytë i Lëklerk, pas Norrisit të MekLarenit, ishte ende një sinjal i rëndësishëm pas një fillim-sezoni për t’u harruar. Emocioni i krijuar nga mbërritja e shtatë herë kampionit të botës, Luis Hamilton, premtonte diçka krejtësisht të ndryshme në radhët e Ferrarit. Por, tashmë që ka kaluar një e treta e kampionatit, “kokëkuqja” ende nuk e ka provuar shijen e fitores dhe i gëzohet vetëm dy podiumeve. Vitin e kaluar, suksesi i parë i Ferrarit erdhi me fitoren e Lëklerkut, pikërisht në garën e tij të shtëpisë, në Monako, duke thyer edhe një tabu personale.
Më pas ekipi italian u përmirësua ndjeshëm, teksa përfundoi duke luftuar për titullin e Konstruktorëve deri në kthesën e fundit të garës së fundit. Këtë herë rikthimi duket më i vështirë, duke marrë parasysh diferencën prej 177 pikësh nga kreu pas tetë garave të para, por sfida tjetër e planifikuar për të dielën në Spanjë mund ta ndryshojë situatën.
