Ruben Loftus-Çik më në fund zhbllokohet. Mes fushori anglez i ardhur nga Çelsi ka gjetur golin e parë në Serinë A dhe kaq mjafton që të jetë edhe më i karikuar për sfidën e ardhshme kundër Lacios, një duel me një rivale direkte, pavarësisht se kryeqytetasit kanë pasur një start sezoni që është i denjë për një skuadër që luan për mbijetesë.
Ruben, një gol dhe një fitore me shumë vlera për vazhdimësinë…
Jam shumë i lumtur, pasi u treguam tepër të zotët, duke e përmbysur menjëherë ndeshjen. Kaljari ishte tepër agresiv që në fillim, por bëmë gjithçka shumë mirë.
Goli i parë në Itali, çfarë ndieni?
Jam tepër i kënaqur, sepse erdhi në një ndeshje që u ndërlikua bindshëm që në fillim dhe na duhej pak frymëmarrje. Personalisht çdo ndeshje që kalon dhe ndihem më mirë. Duhet ende të futem ashtu sikurse pjesa tjetër e skuadrës në ingranazhet e plota të ekipit, por e rëndësishme është që fitoret na rrisin besimin dhe të vazhdojmë kështu, pasi duelet e radhës janë gjithmonë ato më të vështirët.
Po, pikërisht… dhe të shtunën keni Lacion…
Pikësëpari do të jetë diçka e bukur për mua, pasi do të takoj pas mjaft kohës Mauricio Sarrin. Ai ka qenë një trajner shumë i rëndësishëm në karrierën time, pasi ishte i pari te Çelsi që besoi totalisht tek unë dhe më dha mundësinë e madhe për të bërë një sezon vërtet fantastik, ai që më shenjtëroi si një futbollist i vërtetë profesionist. Do të jetë një ditë e bukur për mua, edhe pse, i dashur Mauricio, më duhet të të mund.
Duke parë këtë fitore, besoni ende se është Milani ekipi që mund të rivalizojë Interin për titull?
Nuk dua të them as po dhe as jo, pasi Milani e ka detyrë që të luftojë për titullin. Ideja është ajo që të luftojmë në çdo ndeshje dhe të mos fokusohemi që tani te pjesa e renditjes. Duhet të vazhdojmë të stërvitemi për të zvogëluar sa më shumë diferencën që u pa se kemi me Interin në derbi, edhe pse ndeshje të atilla ndodhin.
Çfarë vlerë ka fitorja me Kaljarin, duke parë edhe momentin tuaj joperfekt dhe mbi të gjitha përmbysjen brenda pjesës së parë, në pak minuta?
Unë mendoj se fitore si këto janë ato të cilat në fund të japin titullin kampion. E sigurt është që me këto tri pikë do të shkojmë shumë më të qetë dhe njëkohësisht të karikuar kundër Lacios.
Përgatiti: JETON STAMOLLA – PANORAMASPORT.AL
