Olivie Zhiru nuk zbriti në fushë ditën e djeshme kundër Kaljarit, por sulmuesi francez ishte shumë i lumtur për fitoren e arritur nga shokët e tij, aq sa tani që edhe Interi ka frenuar, duke rikthyer Milanin në të njëjtën kuotën pikë me ta, lufta rindizet sërish.
“Është e vërtetë që deri tani nuk kemi bërë gjithçka në mënyrë perfekte, por e dimë se mund të mësojmë shumë gjëra edhe nga gabimet. Por çfarë është më e rëndësishmja, nëse arrin t’i japësh kampionatit një vazhdimësi serioze, kjo është ajo që bën diferencën në fund dhe ne duam që tani e në vazhdim të kemi një hap më të rëndësishëm, sesa ai që kemi shfaqur. Rruga drejt titullit kampion është shumë e gjatë dhe siç jemi ndalur ne do të ndalen edhe të tjerët. Por, e rëndësishme është që sidomos në momentet e vështira të mos humbim besimin në forcat tona, pasi ju garantoj se kjo skuadër ka shumë cilësi sivjet”, deklaroi francezi.
PANORAMASPORT.AL
