Hansi Flick ka deklaruar vazhdimisht se nuk ndalet të shqyrtojë statistikat e tij. Rekordeve që po vendos te Barcelona, përfshirë barazimin e fillimit më të mirë të historisë së kampionatit, me 9 fitore në 9 javët e para, u kushton rëndësi relative.
Statistikat tregojnë se, nëse nesër mposht PSG-në e Luis Enrique në “Parc des Princes”, trajneri gjerman do të arrijë 100 fitore me Barcelonën. Shifra është mbresëlënëse, pasi që nga mbërritja në verën e vitit 2024, ai do ta ketë drejtuar skuadrën në 129 ndeshje zyrtare në të gjitha kompeticionet. Këto 100 fitore i kanë sjellë dy tituj kampionë, dy Superkupa dhe një Kupë Mbreti.
Luis Enrique, trajneri i PSG-së që do të përpiqet ta pengojë, e arriti këtë shifër pas 126 ndeshjesh, duke u bërë trajneri që e ka arritur më shpejt këtë objektiv në historinë e Barcelonës. Pep Guardiola pati nevojë për 139 ndeshje. Luis Enrique e mbylli aventurën katalanase me 138 fitore në 181 ndeshje, një përqindje prej 76,2%. Flick, me 100 fitore në 129 ndeshje, do të arrinte në 77.5%.
Ritmi i tij mund të jetë edhe më mbresëlënës. Flick humbet shumë rrallë: në 128 ndeshje, Barcelona e tij ka pësuar vetëm 19 humbje. Duke përfshirë edhe 10 barazimet, skuadra nuk ka humbur në 85% të ndeshjeve. Luis Enrique arriti në 88%. Pak skuadra e kanë mundur më shumë se një herë. Atletico Madridi e ka mposhtur 3 herë, por është përballur me Barcelonën në 10 ndeshje, në La Liga, Champions dhe Kupë. Reali i Madridit e ka mposhtur vetëm një herë.
Këtë sezon, Barcelona nuk po gjen rivalë. Ka zhvilluar 11 ndeshje zyrtare dhe i ka fituar të gjitha. Më mbresëlënëse është mënyra se si po fiton; me shumë gola. Ka shënuar nga 5 gola ndaj Elches, Rayo Vallecanos, Valencias, Feyenoordit dhe Betisit; nga 4 gola ndaj Levantes dhe Galatasarayt; si dhe nga 3 gola ndaj Sevillas dhe Getafes. Racingut i ka shënuar 7 gola.
Në total, skuadra ka realizuar 48 gola, me një ritëm shumë më të lartë se ai i sezonit 2011-2012, kur Barcelona shënoi 190 gola në 64 ndeshje. Në këtë pikë të sezonit, skuadra e Flick ka shënuar më shumë.
