Çdo ndeshje futbolli vendoset nga detajet dhe për më tepër një derbi si ai mes Milanit dhe Interit. Për këtë arsye, dy trajnerët do të bëjnë gjithçka në mënyrë që të dominojnë ndeshjen dhe të bëjnë kujdes njëkohësisht. Kuqezinjtë kanë më shumë alternativa, ndërsa Interi është në një situatë delikate dhe do të kërkojë që të dalë prej saj.
MILANI- Humbja ndaj Napolit është plagë dhe me siguri që Konseisao do të ndërhyjë në formacionin titullar për derbin. Para së gjithash, ai shpreson të shërohet Çau, i cili mungonte në Napoli për shkak të një virusi në stomak. Dyshja Gabia-Pavloviç, për ta thënë më butë, sigurisht që nuk dukej e padepërtueshme. Përveç gjermanit, trajneri portugez rikuperon Musahun, i cili ka shlyer pezullimin. Loftus-Çik do të mungojë, pasi sapo i është nënshtruar operacionit të apendiksit.
Është e mundur të hipotezohet një 4-3-3 me Fofana, Musah dhe Reijnders në mesfushë dhe treshen Pulisiç-Gimenez-Leao. Meksikani, pavarësisht se humbi penalltinë, duket se ofron më shumë garanci se Abrahami dhe ka luajtur vetëm dyzet minuta. Sigurisht, megjithatë, më shumë se sistemi dhe individët, trajneri kuqezi do të ishte i lumtur të shihte një qëndrim të ngjashëm me atë të pjesës së dytë ndaj Napolit. Përpara Menja do të aktivizohet Uoker në të djathtë dhe në të majtë do të jetë si gjithmonë Teo Hernandez.
INTERI- Nëse Konseisao ka gjithçka më të kristalizuar, Simone Inzagi duhet që të kërkojë një sforco nga ana e të tijve. Të panjohurat janë të shumta, ku Denzel Dumfris, Taremi dhe Zielinski do të mungojnë për shkak të dëmtimit. Asllani nuk do të jetë për këtë ndeshje prej skualifikimit. Situata është e paqartë për De Vrajin dhe Lautaron, edhe pse argjentinasi me shumë mundësi nuk do t’ia dalë që të jetë gati për këtë ndeshje. Holandezi mund t’ia dalë që të grumbullohet edhe pse do ta nisë nga stoli. Në portë ndoshta mund të jetë portieri i kupës, Martinez, edhe pse në fakt do të jetë e vështirë që trajneri të heqë dorë nga Zomer në një moment të artë. Ka një balotazh aty.
Përpara tij do të jenë Pavar, Açerbi dhe Bastoni që rikthehet pas pezullimit me Udinezen. Ndërkohë që në mbrojtje do të luajë Dimarko majtas dhe Darmian në të djathtë, që mund të alternohet me Zalevskin. Në mesfushë kërkohet që Çalhanoglu të shtrëngojë dhëmbët, ndërsa Barela që nuk do të jetë i gatshëm në kampionat, do të luajë nga minuta e parë. Mkitarkian dhe Fratezi janë në balotazh me njëri-tjetrin, ndërsa trajneri Inzagi do të vendosë në fund për gjithçka. Ndërkohë që në sulm pritet të luajë Korrea nga minuta e parë në këtë ndeshje përkrah Markus Turamit. Arnautoviç shpenzoi shumë energji në sfidën kundër Udinezes dhe për këtë arsye trajneri do ta aktivizojë ndoshta gjatë sfidës.
GENTJAN ALINANI-PANORAMASPORT.AL
