Pasi dueloi fort për titullin kampion për konstruktorë, ku vitin e kaluar u klasifikua në vendin e dytë, këtë sezon, Ferrari synon një rikthim të fuqishëm në majë.
Kjo edhe falë ardhjes së Lewis Hamilton, që do të ndihmojë Charles Leclerc, në një dyshe kampionësh për “kokëkuqen”.
Drejtori sportiv i Ferrarit, Frederic Vasseur, foli për këtë sezon dhe risitë që sjell ai: “Muajt e parë do të jenë thelbësorë për zhvillimin e makinës së këtij viti, por më pas fokusi ynë do të zhvendoset te projekti i sezonit të ardhshëm”.
Siç dihet, makinat e Formula 1 të vitit 2026 do të jenë 30 kg më të lehta dhe do të kenë një gjerësi të reduktuar nga 2,000 mm në 1,900 mm dhe një bazë të reduktuar të rrotave nga 3,600 mm në 3,400 mm.
Rrotat 18 inç do të mbeten, por gjerësia e gomave do të reduktohet me 25 mm përpara dhe 30 mm në pjesën e pasme.
Do të aplikohet gjithashtu sistemi “Push-To-Pass”, që do t’u sigurojë pilotëve një sasi shtesë energjie për një xhiro, duke i lejuar ata të tentojnë parakalimin kur janë mjaftueshëm afër një makine tjetër.
“Unë nuk bëj dot parashikime, por në 2-3 muajt e parë të këtij vitit do të punojmë për projektin e 2025-ës. Më pas do të shohim se çfarë të bëjmë edhe në lidhje me nevojat tona”, sqaroi drejtori i ekipit të skuadrës së Maranellos.
