Luminesen është fituesi i Superkupës së “FSHF Sunday League Albania”, pasi triumfoi në finalen e madhe ndaj skuadrës ATS pas goditjeve të penalltive, me rezultatin 4-2.
Finalja u zhvillua mbrëmjen e djeshme në “Shtëpinë e Futbollit” dhe dhuroi një ndeshje të fortë, të luftuar dhe me emocione deri në minutën e fundit.
Luminesen e nisi më mirë takimin, duke kaluar në avantazh që në minutën e 8-të me golin e Irvi Bylykut. Pjesa e parë u mbyll me këtë rezultat.
Në fraksionin e dytë, ATS reagoi dhe barazoi shifrat me golin e Xhuljano Reçit, duke e mbyllur kohën e rregullt në barazim 1-1.
Fituesi u përcaktua nga pika e bardhë e penalltisë, ku Luminesen u tregua më i saktë, duke realizuar katër gola, ndërsa ATS vetëm dy.
Në përfundim të finales u zhvillua ceremonia zyrtare e dorëzimit të trofeut. I pranishëm ishte specialisti i futbollit amator në FSHF, Erion Gjoshi, i cili i dorëzoi kupën dhe medaljet ekipit fitues, Luminesen.
