I ftuar në emisionin Max Sport, gazetari Fatjon Baze foli në lidhje me problematikat në ndeshjen mes Vllaznisë dhe Dinamos.
Sipas tij, ndeshja ishte e tensionuar dhe, për më tepër, dy penalltitë e akorduara u kontestuan nga pjesëtarët e stafit të Dinamos.
Baze tregoi një detaj interesant kur trajneri i Dinamos, Ilir Daja, u interesua se kush ishte arbitri në sistemin VAR.
“Në fund të ndeshjes pati një debat mes Ilir Dajës dhe gjyqtarëve të ndeshjes. Ai u përplas verbalisht me ta, por u ndal nga djali i tij, që është edhe zëvendëstrajner i Dinamos. Kur shkoi në dhomat e zhveshjes, duartrokiti me ironi tifozët e Vllaznisë. Daja u duk i pakënaqur me gjykimin. Gjatë momentit kur gjyqtari kryesor dha penalltinë e dytë, Daja pyeti menjëherë se kush ishte në VAR. Sipas mendimit tim, vendimet e arbitrit ishin të sakta,” tha Baze.
Vllaznia arriti të fitojë ndaj Dinamos me rezultatin 2-1. Shkodranët janë kualifikuar në finalen e Final Four ku presin çiftin Egnatia–Partizani për të mësuar kundërshtarin në finale.
