FC Liria ka zyrtarizuar përforcimin më të ri gjatë afatit kalimtar dimëror. Bëhet fjalë për sulmuesin Theophilus Solomon, i cili do të mbajë fanellën me numrin 45 te skuadra prizrenase.
Lajmi është konfirmuar nga vetë klubi, që garon në Ligën e Parë të futbollit të Kosovës, duke e prezantuar lojtarin me përshkrimin se “golat janë në gjakun e tij”.
Për 29-vjeçarin, Liria është klubi i pestë në futbollin kosovar, pasi më herët ka qenë pjesë e Ballkanit, Gjilanit, Dukagjinit dhe Vushtrrisë.
Në Ligën e Kosovës, sulmuesi nigerian ka regjistruar gjithsej 63 paraqitje, duke shënuar 13 gola dhe një asist.
Aktualisht, “Arpagjikt’ renditen në vendin e pestë në tabelë me 36 pikë, katër më pak se lideri Vushtrria, që kryeson me 40 pikë. /ATVLIVE.TV
