“Vendimi për të ardhmen e Jack Grealish do të vijë në fund të sezonit”, ka deklaruar sot trajneri i Manchester City, Pep Guardiola. Mesfushori anglez, i cili ka nënshkruar për 100 milionë euro katër vite më parë, ka një kontratë që skadon në vitin 2027 me “citizens”.
29-vjeçari ka qenë vetëm 7 herë titullar në Premier League këtë sezon dhe nuk u aktivizua në finalen e humbur të FA Cup ndaj Crystal Palace (0-1). Kjo ka nxitur spekulimet se ai mund të lëvizë këtë verë, por Guardiola këmbëngul se asgjë nuk është përcaktuar.
Mediat sqarojnë se do të zhvillohen diskutime midis drejtorit të futbollit në largim Txiki Begiristain, pasuesit të tij Hugo Viana dhe përfaqësuesve të lojtarit. “Ne nuk folëm me të. Njerëzit nuk më besojnë, por këto gjëra i përkasin agjentëve dhe klubit. Ata do të vendosin”, tha Guardiola.
“Ajo që do të ndodhë do të ndodhë, por ai duhet të kthehet për të filluar të luajë përsëri minuta.
Të gjithë ata që luajnë pak minuta janë të mërzitur, kjo ndodh me çdo ekip. Kur skuadra fiton ata duhet të kuptojnë se si ndodh gjithçka”, shtoi trajneri spanjoll.
