Pep Guardiola ka shprehur krenarinë e tij për mënyrën se si Manchester City u paraqit në ndeshjen ndaj Arsenalit, e cila përfundoi në barazim 1-1 në javën e pestë të Premier League.
Edhe pse City u ndëshkua me gol në minutat shtesë dhe pati vetëm 33 përqind të posedimit të topit, përqindja më e ulët në 601 ndeshjet e Guardiolës në garat e ligës, trajneri spanjoll vlerësoi maksimalisht angazhimin e skuadrës së tij.
“Jam shumë krenar, shumë i lumtur, nuk di as cilën fjalë të përdor”, ka thënë fillimisht Guardiola.
“Ne kemi rifituar shumë nga ato që na mungonin sezonin e kaluar. Kemi një shpirt të jashtëzakonshëm. Nuk do të mund të luajmë në këtë mënyrë gjatë gjithë sezonit, dhe për të qenë i sinqertë, as nuk duam”, tha tekniku spanjoll i Manchester Cityt.
