Pas fitores 4-1 të Norvegjisë ndaj Italisë, Erling Haaland shpërtheu në televizionin norvegjez, duke akuzuar Gianluca Mancinin për provokime.
Erling Haaland ishte protagonist absolut i Norvegjisë, e cila me triumfin 4-1 në “San Siro” siguroi kualifikimin e katërt në histori drejt Kampionatit Botëror. Menjëherë pas ndeshjes, sulmuesi u shfaq në televizionin norvegjez jo vetëm për të festuar suksesin, por edhe për të shpjeguar metodat mbrojtëse të Italisë.
Duke komentuar ndeshjen, Haaland u ndal te sjellja e Gianluca Mancini-t, mbrojtës i Romës, i cili sipas tij e kishte provokuar me mënyra të pazakonta gjatë lojës. Norvegjezi foli pa dorashka, duke e thumbuar italianin drejtpërdrejt në transmetim:
“Mancini filloi të më prekte të pasmet kur rezultati ishte 1-1. Mendova: ‘Çfarë po bën ky?’. Pastaj u motivova dhe i thashë: ‘Faleminderit për motivimin, hajde të vazhdojmë’. Shënova dy gola dhe fituam 4-1. Prandaj e falënderoj.”
Kjo deklaratë ka shpërthyer debatet në rrjetet sociale dhe në mediet norvegjeze, të cilat po diskutojnë më shumë gjestin e Mancini-t dhe reagimin fitimtar të Haalandit sesa vetë fitoren historike.
Krenaria e Norvegjisë në “San Siro”
Pavarësisht polemikës me Mancini-n, Haaland vlerësoi edhe paraqitjen kolektive të skuadrës së tij, duke e cilësuar fitoren në Itali si një nga më të rëndësishmet në historinë e fundit të kombëtares norvegjeze.
“Kjo është ndoshta ndeshja më mbresëlënëse që ka zhvilluar skuadra deri tani. Të fitosh 4-1 këtu është vërtet e veçantë. Kjo fitore tregon se jemi të paparashikueshëm. Tani ekipet e mëdha po na marrin vërtet seriozisht.”
