Alfonso Dejvis është lakuar si emër i mundshëm për të ndryshuar ambient në sezonin pasues, por që deklarata e vetë futbollistit kanadez u ka dhanë fund aludimeve të tilla.
Javën e shkuar, 22-vjeçari shprehu dëshirën për të luajtur si anësor në fazën ofensive te Bajerni, pikërisht mbi qëllimin fillestar ku u ble nga Vankuveri, zëvendësimin e Arjen Robenit. Prej vitit 2019, Alfonso ka shërbyer në Mynih vetëm në repartin difensiv, përveç javëve të para si sulmues krahu. Herbert Hainer ka replikuar në adresim të amerikono-veriorit, duke ia bërë të qartë se nuk do të ketë zhvendosje nga roli aktual.
“Dejvis di ta kryejë më së miri detyrën nga korsia e majtë si mbrojtës, madje ai cilësohet me të drejtë si ndër më të mirit në atë rol. Nuk ka arsye se përse ai duhet të shkojë më lart. Vlen të ceket se ne kemi një arsenal të vërtetë në fazën ofensive si Sane, Gnabri, Koman, të cilët kanë interpretuar në mënyrë lineare”, përfundoi shkurtimisht Hainer.
Mbetet interesante se cila do të jetë qasja e futbollistit me numër 19 në “Allianz Arena” pas këtyre frazave.
PANORAMASPORT.AL
