Në këtë vend u kthye nëntorin e kaluar. Besnik Hasi ka kujtime shumë të bukura nga Belgjika, ku ka dalë kampion si lojtar e si trajner, ndërsa po e vazhdon këtë sezon në stolin e KV Mechelen, teksa pasi e mori ekipin në vendet e fundit, ish-kapiteni i Kombëtares shqiptare nisi sukseset dhe tani pranë fundit të sezonit pretendon për një vend në Evropë.
Mechelen mund të kualifikohet në Conference League. Vetëm në 2024, Hasi ka 10 fitore në 13 ndeshje, ndërsa ka provuar vetëm një humbje. Natyrisht, puna e shqiptarit nga Gjakova nuk ka kaluar pa rënë në sy.
Skuadra e Mechelen ka nisur prej 3 javësh bisedimet për rinovimin e kontratës, e besohet se tekniku do ta ketë përparësi të vazhdojë një punë të nisur vetëm para pak muajve. Gjithsesi, në Belgjikë ka edhe klube të tjerë të interesuar për të.
Këta, sipas mediave belge, janë Gent, Genk dhe Antwerp, që vjet u shpall kampion. Kujtojmë se Hasi fitoi titullin në stolin e Anderlecht në 2014, e po ashtu Superkupën e Belgjikës, ndërsa si lojtar ka dalë 4 herë kampion me Genk e Anderlecht, si dhe ka fituar kupën e Superkupën. /i.m /abcnews.al
