Në intervistën e tij të fundit me “ESPN”, sulmuesi i Bajernit, Herri Kejn, deklaroi se është jashtëzakonisht i lumtur në klub. Anglezi nuk humbi kohë, duke hedhur poshtë spekulimet që e lidhin atë me një rikthim në Premier Ligë.
“Nuk jam i sigurt. Gjithmonë kam thënë gjatë karrierës sime se nuk më pëlqen të mendoj shumë përpara. Shumë i lumtur këtu në Mynih. Mendoj se kemi një ekip mbreslënës dhe staf fantastik stërvitor. Thjesht ndihem sikur jam në formën më të mirë dhe dua të luaj në nivelin më të lartë të mundshëm dhe ky është niveli më i lartë që ekziston.
E di se shumë gjëra mund të ndryshojnë në futboll në një kohë të shkurtër dhe shumë të tjera mund të ndodhin, por në fund të fundit, fokusi im është këtu. Unë nuk jam duke menduar për një ekip tjetër. Thjesht më pëlqen të shkoj me rrjedhën dhe tani rrjedha është në Bajern”, përfundoi Kejn.
PANORAMASPORT.AL
