Gjatë një prononcimi për mediet gjermane, Hoakim Lëv tregoi diçka më shumë për vizitën e tij në hotelin ku u akomodua Kombëtarja gjermane e futbollit, ngjitjen e Shtutgartit në Bundesligë, të ardhmen e tij si trajner dhe dhe tregoi një anekdotë rreth Xhamal Musialës.
“Oliver Bierhof dhe unë shkuam në Mynih në pranverën e vitit 2021 dhe patëm biseda me të, natyrisht edhe me nënën e tij. Ai është rritur në Angli, kishte miqtë e tij atje. Kur shkuam ta takonim po mendonte nëse donte të luante për Anglinë apo Gjermaninë. Mund të them me përgjegjësi të plotë se ai është i vetmi që ka marrë një premtim nga unë. I thashë se do të ishte në Kampionatin Evropian 2021 nëse do të zgjidhte Gjermaninë”, tha Lëv.
