Pavarësisht kundërshtimit të trajnerit Diego Simeone, i cili në prag të ndeshjes tha se “nuk kishte kuptim të luheshin ndeshjet e La Ligas këtë fundjavë” për shkak të përmbytjeve që goditën Valencian dhe zonat përreth, Atletico e Madridit doli në fushë kundër Las Palmas dhe fitoi 2-0. Protagonist i ndeshjes ishte Giuliano Simeone, djali i trajnerit dhe vëllai i vogël i “Colitos” që luan për Napolin, si autor i njërit prej dy golave të shënuar nga “Los Colchoneros”.
Jashtë stadiumit “Metropolitano” u mblodhën donacione me ushqime dhe produkte të tjera të dobishme për të mbështetur njerëzit e prekur nga përmbytjet në lindje të Spanjës që vranë më shumë se 200 persona, ndërsa në tribuna tifozët asistuan në suksesin e ekipit të tyre.
“Jam shumë i lumtur për golin tim të parë me fanellën e Atleticos, por nuk mund të injorojmë gjithçka që po ndodh në Valencia, ku ka shumë viktima. Mbështetja dhe forca ime shkojnë për ta”, ka komentuar Giuliano Simeone, autor i golit të parë të skuadrës së tij.
Ishte minuta e 37-të kur topi i gjatë i Nahuel Molinës gjeti Simeone jr, të vendosur si sulmues anësor në të djathtë, i cili rrëshqiti pas mbrojtjes, hyri në zonë dhe e futi topin në këndin më të largët. Goli i dytë erdhi 6 minuta para fundit nga Sorloth.
I lumtur babai Diego, i cili megjithatë në fund të ndeshjes donte të nënvizonte se “Unë e shoh Giulianon thjesht si futbollist. Që në momentin e parë kur vendosëm që ai të qëndronte me ne këtë sezon, e bëmë me qëllim që ta na ndihmonte. Ai ka një përgjegjësi dhe jo një emër, unë e shoh kështu: kush vrapon më shumë luan dhe kush nuk vrapon, luan më pak”, tha trajneri argjentinas.
