Vinicius Xhunior u shfaq i lumtur pas golit të shënuar në minutën e 99-të, që i dha fitoren Brazilit pas dy barazimeve radhazi në kualifikueset për Kupën e Botës 2026.
“Jam shumë i lumtur me paraqitjen. Ne e meritonim këtë fitore dhe unë gjithashtu e meritoja këtë gol për gjithçka kam bërë deri tani. Unë jam në borxh të madh me këtë Kombëtare, me gjithçka ata kanë bërë për mua. Të luash për Kombëtaren është diçka që nuk mund ta përshkruaj. Sa herë që ne vijmë këtu, duket sikur vijmë për herë të parë. Unë nuk godas shumë nga jashtë zone, por këtë herë kisha besimin se mund të shënoja. Ne luajtëm shumë mirë në këtë sfidë. Mendoj se jemi në rrugën e duhur për t’u kualifikuar për në Kupën e Botës”, tha ndër të tjera ylli i Brazilit dhe i Real Madridit, Vinicius Xhunior.
Sulmuesi i dha fitoren Brazilit pas dy barazimeve radhazi në kualifikueset për Kupën e Botës, ndërsa Kombëtarja e drejtuar nga Dorival po kritikohej shumë për paraqitjet e tyre. Brazili aktualisht është ngjitur në kuotën e 21-pikëve, ndërsa po përpiqen t’i afrohen Argjentinës kryesuese.
PANORAMASPORT.AL
