Klaudio Fenuçi, administratori i klubit të Bolonjës, ka shpërthyer në kritika pas ndeshjes që skuadra e tij barazoi ndaj Juventusit. Ai ishte shumë i acaruar me gjykimin e kësaj sfide, teksa është i bindur se ekipit të tij i është mohuar një penallti e qartë që mund t’i jepte fitoren skuadrës.
“Ky është momenti për të folur për gjyqtarët. I bëj komplimentet e mia skuadrës, por një gabim i jashtëzakonshëm i gjyqtarëve na ka hequr nga duart një fitore të sigurt. Kishte një penallti dhe karton të kuq. Jam këtu për të mbrojtur djemtë dhe tifozerinë, pasi nuk ishte një fitore banale. Puna që po bëhet prej vitesh për VAR-in duhet përmirësuar, janë episode të pabesueshme.
Një lojtar i rrëzuar para portierit nuk mund të sjellë gjë tjetër veçse penallti dhe karton të kuq. Një gabim në epokën e teknologjisë që është i padurueshëm. Ka keqardhje pasi po punohet prej shumë vitesh rreth teknologjisë. Unë kam qenë një prej atyre që kanë kërkuar afrimin në kohë të integrimit të VAR-it dhe nuk arrijmë të kuptojmë se si në episode si ky nuk mund të ndërhyhet. Është me të vërtetë një çmenduri”, tha ai për “DAZN” në përfundim të sfidës së sotme.
PANORAMASPORT.AL
