Një burrë është arrestuar dhe akuzuar, pasi Xhek Grilish, mesfushori i Mançester Sitit, është goditur në fytyrë nga një tifoz gjatë derbit të Mançesterit. Grilish po largohej nga fusha pas barazimit 0-0 të dielën, kur një tifoz pranë tunelit, në fund të “Stretford End”, e thirri atë.
Në pamjet tronditëse, Grilish duket që sulmohet pas këtij momenti, ndërsa “Daily Mail” zbuloi se ka nisur një hetim nga policia. Një burrë 20- vjeçar u akuzua për sulm dhe do të paraqitet përpara gjykatësve të Mançesterit në korrik. Grilish, 29 vjeç, nuk besohet të ketë pësuar dëmtime serioze pas agresionit.
Ai hyri në lojë në vend të Ilkai Gyndoanit në minutën e 74-t. Si Siti, ashtu edhe Junajtid kanë refuzuar të komentojnë për shkak të hetimit. Junajtid thuhet se po bashkëpunon ngushtë me policinë.
Një zëdhënës i Policisë së Mançesterit të Madh tha: “Alfi Holt, 20 vjeç, nga Hevën Drajv, është akuzuar për sulm. Ai do të paraqitet në Gjykatën e Magistratëve të Mançesterit. Kjo akuzë lidhet me një incident që ka ndodhur në klubin e futbollit ‘Old Trafford’ të dielën”. Incidenti ndodhi në fund të një ndeshje të mërzitshme, ku Fill Foden i Sitit po fyhej vazhdimisht nga tifozët e “Djajve”. Pas ndeshjes, trajneri i Sitit, Pep Guardiola, tha se fyerjet për nënën e lojtarit të Anglisë tregonin “mungesë klasi”.
PANORAMASPORT.AL
